2Ti 3 | BEF | STEP | Kaga mone'ya ma luto keheli bati hubo. Kana'a su halube'mu nohinogo foipana nasana huto huto sipi'a hilube'mu ketana napa'a huto hilina'mu yabe.

2 Timothy 3

Kana su halina kumu yabe

1 Kaga mone'ya ma luto keheli bati hubo. Kana'a su halube'mu nohinogo foipana nasana huto huto sipi'a hilube'mu ketana napa'a huto hilina'mu yabe. 2 Ana kanagu bona'i ya'ma hite minalabe. Enali lisipa bite to enali'ani'mu kehelinogo tinogo yogo fe'no kumu enibita hinogo minalana enali'ani lolo hite melete hilana nasana'mu enibita'ani hinogo enegelo bilete hipu hapu hilatana, enali'ani enugufa'ani lelite tite minalana, enemegeka lilatana, ito'anigi afo'anigihi kaga'ani pelesa ite keheli he'milata, ana'ina asaga'i libe laga hube hilana. Ya nehite ana'ina lamana'a mone neepinogo enofokehi lite nalalu'nimakabe melise komopa'ani bati mehinogo minalana'mu yabe. To enali Hu'mamofihi gi'a liyafa mehise fa'mene minalabe. 3 To enali komopa'anigu ule'ale hite fato bona'i meenehe'malata to eniginaga fi meepilata to huli tali ka lite fato bona'mu faga faga lilata, fatehe bona'i yaga kala suhi hite minete hagulu tite minalana, ana'ina lamana'amofihi libe pigi bibe hilana'mu yabe. 4 Enali enimi'mi ka lite enimi enama'i melelata, to ka mekehelise kegeiyo hite luna lana asaga'i hilata, to enali'ani'mu enigi'ani'mu hofa talune lilata, to Hu'mamofitoga agoya hu meemise hite komopa'ani ya'ma enugufa'aniuba enibita hulata nohinamofitoga malalabe. 5 Ya hilete ya'ma mono'mofihi bu ganamofihi gufa'a lolo hilinaya aku'i lusi mono'mofihi amuya'a hiti ya'ma hapa'amofihi mekehelise analo enemegesa hi emilabe. Ya hilete minenogo enalitogati he'milotoka kemegesa hu epibo. 6 Bona'i ya hana'amagihi enalitogati luga'a enali legeso hite sibi sibi humofa'na nehite ana'magihi nonugu tite fato fato kaga lu epite enegekesa lite enali'ani enemege'i malalabe lite enele'melata hilabe. Ana ana'i enali komopa'anigu lapa mebi'ahana foipana kofilata to enugufa'aniuba laga besise nasana fato fato'i ya'ma keta'a hiti lite minete nehana. 7 Ana ana'magi mono kagu keheli keheli nehana bona'magihi ka'ani kehelilata nehanaya aku ka lamana'a keheli fe melilabe. 8 Koyapa'i Mosehi kanagu bo loemo etali etigi'atiti Yanego Yapelego etali ya'ma Mosehi ka hega he'aha'ina ya ana etali suko hite ma'asi lu kimi'ohuna bona'i enali komopa'ani haya kolo'ehina mono'mofihi kapo'a nehe'mite negi nete sibi lolo nehana. 9 Ya hanaya ana'ina lite minete yamofihi ya'ma hena hena hite ime ime tilabe? Enali ya'ma negi nelata nehanamofihi hapa'a huto hinogo asaga'i enali bu ge su hete bu galana'mu yabe. Yanego Yapelego etali ana suhi hite negi ne'aha'inamofihi hapa'a ahuto hu'ehinamo ni'ibe.

Timotihi ekesa lito lu su hoto lu emi'ehina ka'a

10 To kaiba, nani hapa'ni akeheli'ahane. Nani minoto hu'ohuna kai ya'ma minoto lolo huto moloto hu'ohuna to mono ka fi lehe toto moloto hu'ohuna, foya li'ohuna yamofihi hapa'a kelepi'ohuna, to keheli amuya moloto mino'ohunamofihi ana'ina asaga'i kosele'i menehago amuya moloto mino'ohuna kai keheliloto nemege'i molo'ahane. To nemehi epito mino'ohuna, to baga'a hiti yamofihi nugupisalo tilago amanapa huto ho tito mino'ohuna, to kalana'i mele netago komopa'nigu gabu gise'namofihi komopa'agu mino'ohuna akeheli'ahane. 11 To keheli'ahataya Atioki hepatoga hiti Ikoniu hepatoga to Lisitala hepatoga hiti sipi kalana'i fato fato'mofihi mele netago keke'i luse'namofihi komopa'agu mino'ohunamo ya nohugo nemege'i moloto nooto bu nogo'ahatamo ni'ibe. Ya huto mino'ohunamo ni'inaya Sipi Bouba ananaguti gulu ho netoto nubuto bi'ehina yabe. 12 To bona'i Yesu Kilisito aitoga bite i hepite mono kapolo bilana ya'ma enali asagatoga kalana'i melelata nasana enali enugupisalo tilube'mu hibe. 13 Ya hu'ehinaya bona'i foipa'a enali enimi'i melenogo lelite nebite fala kite bite ai mi'i malago ai mi'i malago ya'ma foya'a lelite nebinogo napa ho lito buto hofa talube'mu hibe. 14 To kaiba ya'ma ka lamana'a lu kimi'ohugo keheli ule'ale nohatana li pili koto liloto mino lito buto keheli amuya molobo. Kai ya'ma ka lu kimi'ohuta bona'magita lali'i akeheli'ahane. 15 Kai pana'i lagaso'a minoto guna molose mono bukugu lataha'agu leka solito buto mino'ahata ni'ibe. To ana kagauba kegekesa le'mo hokolo huloto Yesu Kilisito kumu keheli amuya malalane, luto Hu'mau kubuto bilina'amofihi kapogu kelepito kele'mo hetofa higo ka'a akeheli'ahane. 16 Mono'i lataha'a buku silaga'i ya'ma Hu'mau enele'mo bati huto komopa'ani enele'mo babahi higo li huto hi'ahanamo ni'ibe. Yanaguti leka soto nokehelugo mono kamofihi hapa'a lelepi bebe solata nohibe. Ya nohuto legekesa lito minoba minoba huto nohibe. To faga nolutogo lele'mo kapo lamana'alo mololata nohibe. To sibina nohutogo ai ka lemekilata nohibe. To legekesa lito lele'mo bebe solata nohibe. To bebe soto minoto lito hilutamofihi kapo nolelepito lele'mo bebe senogo, 17 Hu'mamofihi foya'alo lilata bona'i lali lamana'a lolo huto minoto mono kagu labaga hiti minoto mono foya lamana'a fato fato'mofihi lito minalune'mu hune.